محاوره بين صديقين عن العراق ...
الاول (غريب الدار)
ياليل هم رجعت ... شتريد ولك يا ليل
من وحشتك شيبت ... و الحيل ما ظل حيل
مثل الرماد اشتعل ... و ابقى احترك كلي
من اذكر امي الصبح ... من تكعد تصلي
الثاني
يا ما نصحتك انا ... تذذذكّر شنساك
كتلك بلادك ذهب ... هو الذي سواك
و انت ابن هذا البلد ... لا تنكر الرباك
غشوك وصفولك ... دنيا و سعادة و خير
ما تدري شما هجر ... لازم يعود الطير
الاول
هسه انا وين اصبحت ... عنهم و وين اهلي
بس عين عندي بقت ... منها الدموع تسيل
اشتاكيت لاهلى انا ... و لكعدت اخواني
و كلمة هلا و مرحبا ... بشفاف جيراني
الثاني
شوداك لاهل الغرب ... شتسوي رحت هناك
من ترجع من الشغل ... منهو اليتلكاك
امك تحضر الغدة ... و اختك تصبلك ماي
جاي انت من الشغل ... مية هلا بهالجاي
و كلشي محضر الك ... و كاوي لك هدومك
و ابنك يشبكك شبك ... و يشاركك نومك
الاول
شتاكيت لاهلي انا ... و لكعدة اخواني
و كلمة هلا و مرحبا ... بشفاف جيراني
ملعون هذا الزمن ... ليوين وداني
خلاني اخلص الوكت ... بالحسرة و الياويل
الثاني
تشوفهم بالغرب ... كل واحد و ربعه
تكعد و مالك ربع ... و بعينك الدمعة
مو جنا نطلع سوة ... للجامع الجمعة
و الثوب ابيض حلو ... و من تمشي شمحلاك
لعد متكلي ... منو اللي وداك هناك
الاول
الليل بس يم هلي ... ثوب الفرح لابس
و محلاهه من تنسمع ... صفارة الحارس
زاد اهلي طيب يظل ... لو بس خبز يابس
و مكروه زاد الغرب ... بل منة والتذليل
الثاني
ببغداد عدنا حلو ... لمن يصير غروب
عالجسر ويم النهر ... تمشي ويه المحبوب
و دجلة تحضنك حضن ... و تحس العمر ما فات
و محلاهه لمت هلك ... و كاعد بالكريعات
الاول
شتاكيت انا لموطني ... و احسد اللي شافة
و لماي دجلة العذب ... من تشربه تتعافه
يا ريت منه العسل ... لو رادن شفافة
و انا الك مشتاك ... يا جاي يا بو الهيل
الثاني
و لو تجي و تفتر بعد ... و تدخل على المنصور
طيبة و حنان و عشك ... و طيور احلى طيور
و العيد عدنا حلو ... والله يا عيدي
يله نقارن سوة ... و ايدك تظل بيدي
ايفل..وبرجه..وهله.. ... ولندن..وكل تكساس
يروحون فدوة و نذر ... لشارع ابو نؤاس
موضوع: محاوره بين صديقين عن العراق ... 
الجمعة مايو 22, 2009 4:39 am
